Con este Real Decreto permitirase optar por un cobro mixto dos incentivos da xubilación demorada, para quen atrase voluntariamente a súa xubilación, combinando a percepción dun pago único e un incremento porcentual sobre a súa pensión.
O cobro mixto foi previsto no primeiro paquete de reforma das pensións aprobado a finais de 2021, na Lei 21/2021, do 28 de decembro, de garantía do poder adquisitivo das pensións e outras medidas de reforzo da sustentabilidade financeira e social do sistema público de pensións, ata a data os interesados só podían, elixir entre a porcentaxe adicional de prestación ou o pago único, debido a que estaba pendente de desenvolvemento regulamentario a terceira opción de combinar ambos os incentivos.
A partir da aprobación deste RD 371/2023, cando se acceda á pensión de xubilación a unha idade superior á idade ordinaria ou a idade de xubilación forzosa (Clases Pasivas), recoñecerase ao interesado por cada ano completo cotizado que transcorra desde que reuniu os requisitos para acceder a esta pensión, un complemento económico que se abonará dalgunha das seguintes maneiras, a elección do interesado:
- Un 4% adicional sobre a contía da pensión correspondente.
- Unha cantidade a tanto alzado por cada ano completo cotizado entre a data en que cumpriu dita idade e a do feito causante da pensión, cuxa contía virá determinada en función dos anos de cotización acreditados.
- Unha combinación das solucións anteriores.
Para aqueles que opten pola nova fórmula do incentivo "mixto", e atrasen a súa xubilación entre 2 e 10 anos, o complemento consistirá na suma dun 4% adicional por cada ano da metade dese período, e unha cantidade a tanto alzado polo resto. Se se atrasasen 11 ou máis anos a xubilación, o incentivo será dun pago único aplicado a 5 anos do período demorado e unha porcentaxe adicional do 4% por cada un dos anos restantes.
A elección pola modalidade de pago do complemento económico efectuarase no momento da solicitude da pensión de xubilación. De non exercitarse polo beneficiario, aplicarase o complemento económico na modalidade dunha porcentaxe adicional do 4%.
Unha vez elixida a modalidade de cobranza, non poderá ser modificada con posterioridade.
