WEB - EDUCAR EN LIBERDADE, sen censura nin politización nos centros educativos
Desde ANPE Galicia, sindicato independente do ensino público, manifestamos a nosa preocupación pola recente instrución da Consellería de Educación, que persegue a «neutralidade ideolóxica» nos centros educativos, xerando inquietude entre a comunidade educativa ante un posible veto a determinadas actividades, amparado en calquera escusa de “neutralidade”, que pode converterse nun control encuberto do pensamento crítico.
1. Centros educativos, espazos de diálogo e pensamento libre
Os centros deben ser lugares onde alumnado e profesorado poidan exercitar a capacidade de reflexión, escoita activa e espírito crítico. Non poden ser convertidos en campos de batalla ideolóxicos nin en áreas de propaganda.
2. A delgada liña entre liberdade educativa e politización
Existe unha fronteira moi fina entre fomentar o espírito crítico e caer nunha politización premeditada. Respetar o debate e promover actividades que abran horizontes non é politizar; é educar.
3. NON ao veto ideolóxico disfrazado de neutralidade
Comprendemos que a Xunta quere evitar conflitos nos centros, pero advertimos que calquera instrución que restrinxa actividades culturais, debates, proxectos sociais… baixo o pretexto dunha suposta neutralidade pode prexudicar gravemente o dereito á liberdade de conciencia e á libre expresión educativa.
4. Chamamento ao diálogo e ao respecto da comunidade educativa
Instamos á Consellería a abrir unha mesa de diálogo aberta e transparente, na que participen todas as partes interesadas – sindicatos, claustros, consellos escolares, direccións…– para acordar criterios claros que protexan o espírito crítico sen caer en imposicións. A comunidade educativa non merece ser tratada como suxeito pasivo ou manipulable.
5. ANPE vixiante e comprometida coa defensa dos dereitos docentes
Como sindicato independente, ANPE seguirá atentamente calquera tentativa de recortar dereitos dos docentes ou do alumnado. Defenderemos a educación pública galega, plural e crítica, e non toleraremos que se impidan actividades que fomentan o pensamento reflexivo e a participación cidadá.
Para ANPE, a educación non é neutra: é un espazo de formación integral, de intercambios pacíficos de ideas, de liberdade de conciencia. Debemos garantir que os centros sexan refuxios de concordia e non espazos de polarización nin de enfrontamentos políticos e ideolóxicos.
