Tras a publicación, o día 21 de agosto de 2024, no Diario Oficial de Galicia da Orde do 2 de agosto pola que se modifican as unidades e postos de traballo docente para o curso 2024/25 dependentes da Consellería de Educación, as organizacións asinantes do Acordo sobre medidas que melloran o funcionamento do sistema educativo e as condicións laborais do profesorado galego, CCOO Ensino, ANPE e UGT-SP, queremos deixar constancia de que, grazas ao seu asinamento, inverteuse a tendencia, que xa viña sendo habitual cada inicio de curso na última década, de peche de aulas nas etapas de infantil e primaria e destrución de postos de traballo, sobre todo no medio rural.
Desta forma, a diferenza entre aulas suprimidas e creadas no ensino público é positiva este curso por primeira vez en máis dunha década, xa que en total haberá dez aulas máis en toda Galicia (catro de educación infantil, cinco de educación primaria e unha de educación especial) e 21 postos de traballo definitivos máis ca o ano anterior e, polo tanto, de carácter estrutural. Este incremento do número de aulas estruturais e de postos de traballo de carácter definitivo rompe a tendencia de descenso dos últimos anos, xa que tan só nos últimos tres anos o peche de aulas chegara a un total de 239 unidades de infantil e primaria suprimidas e a unha destrución de 334 postos de traballo no mesmo período.
A inversión desta tendencia só se explica grazas ao asinamento do Acordo de Medidas de Mellora, pois o número de alumnado segue a reducirse na mesma proporción ano tras ano: 2747 alumnos e alumnas menos. Se evitou o peche de 204 aulas só este curso, cunha previsión de 900 aulas que non pecharán nos seguintes tres cursos por esta mesma razón.
